skip Loading - تخطي التحميل
Ahmed Mohamed Hamed

مقالات عامه

ليه نستخدم اطر العمل ؟

2018-09-11 21:32:40 / مقالات عامه / 0 تعليق / Ahmed Hamed
...

ليه نستخدم اطارات العمل في التصميم والبرمجه ؟ وايه هيا مميزاتها وعيوبها
الأول يعني ايه اطار عمل : بكل بساطه هو نظام تم تكويده أو برمجته من قبل اشخاص اخرين وذلك لتوفير الوقت والجهد علي المبرمج سواء في التصميم أو في البرمجه غير انه بيضيف لموقعك ميزات وامكانيات خرافيه ، خرافيه ! ايوه خرافيه ! ، هقولك ازاي حالا

طيب الأول اكيد هتسألني تقولي طب انا ليه استخدم حاجه شخص تاني مبرمجها لما في أيديا اني اعملها انا ، أقولك ليه ، لما يجيلك عميل عاوز موقع شخصي مثلا منك ف خلال كام يوم ، هتقدر تعمل نظام كامل متكامل من الصفر في يومين تلاته مثلا !؟ ، طبعا لا .. نفترض أنك قدرت تعمله .. هل فعلا هتطلعه بنفس الجوده اللي هيطلعهولك اطار العمل ، بكل تأكيد لأ

اطر العمل او اطارات العمل من أجمل واسرع التقنيات اللي ممكن تقابلها في حياتك ، مبقاش فيه مصمم أو مبرمج دلوقت يقدر يستغني عنه خاصةً الشركات لأن العامل الاهم عند الشركات هو السرعه وتوفير الجهد وفي نفس الوقت الاحترافيه في الشغل والاتقان والجودة ، ومبقاش حاجه تقدر تعمل كده غير اطر العمل ، فعلا اطر العمل العالميه والاحترافيه اللي هنذكرها تحت دي متعوب عليها سنيين من مبرمجين وشركات تقال جدا في المجال

طب هلاقي واحد بيسألني طيب ليه أدرس اللغه الأم لاطار العمل لما ممكن أدخل علي الاطار علي طول وابقي وفرت وقت ومجهود أنا كمان في الدراسه ! ، طب تعالي نقارن بين واحد دارس اللغه الأم للاطار وواحد لأ .. خلينا نبدأ باللي مش دارس اللغه الأم لاطار العمل ودخل علي الاطار علي طول وهوا مفكر ان هوا كده خلاص هيعمل اللي معملوش حد ! ، تخيل معايا لو مشكله صغيره جدا وقفت قدامه زي مثلا لو بيستخدم اطار عمل زي ال Bootstrap ووقفت قدامه مشكله في انه عاوز يعمل حاجه في دماغه بس مش موجوده أصلا في الاطار ففي الحاله دي مفيش حل غير اللغه الأم ، هل هيعرف يعمل class جديد مثلا بالحاجه اللي هو عاوزها دي .. للأسف لأ .. أنت متخيل معايا اصلا واحد عمال بيكتب في شويه classes وهو أصلا مش عارف جواهم ايه .. ايه بيخليهم يعملوا اللي هوا عاوزه ! ، تخيل الشخص ده ممكن يتقال عليه ايه !

يا سيدي خلينا نقول ان هوا نجح وعرف يشتغل باطار العمل من غير ما يكون دارس اللغه الأم والاطار حققله كل حاجه بيتمناها في حياته .. وطبعا ده استحاله ، نفرض بقي جاله interview في أي شركه وليكن أصغر شركه برمجه في مصر هيبقي شكله عامل ازاي وال HR بيسأله سؤال هايف أي واحد مبتدأ لسه وبيقول يا هادي في المجال يقدر يجاوبه ! ، وهو للاسف مش عارف ليه لانه دارس اطار العمل مباشره بدون اللغه الأم ! ، فأحب أبشرك أنك وللأسف الشديد ملكشي أي مستقبل وهتفضل محلك سر ومش بتتقدم أبدا

ده بقي غير واحد فاهم وعارف ودراس اللغه الأم لأي اطار عمل هو دارسه ، من أول مشكله الشخص ده هيقع فيها هيقدر يحلها بكل سهوله جدا لكونه فاهم هو بيكتب ايه وايه ممكن يعدله باللغه الأم علشان يحل المشكله دي

الفرق بينك وبين الشخص ده هو أنك هتفضل محلك سر مستني أي فرصه لوظيفه علشان تقبلك بالوضع اللي أنت عليه ، والشخص التاني ممكن يكون وصل لمراحل أنت كنت بتحلم توصل لنصها أصلا
علشان كده بنقول يا جماعه متذاكرش اطار عمل من غير ما تدخل علي اللغه الأم بتاعته وتكون عارف الاساسيات علي الاقل ان مكنشي لازم تعرف اكتر من الاساسيات يعني

طب ايه هيا اطر العمل اللي ممكن استخدمها في برمجه المواقع الالكترونيه
خلينا نقوم بعض أطر العمل المبرمجه بال PHP
وحسب ترتيبهم في الأكثر انتشارا واستخداما في 2017

  • أولا Laravel Framework => وجه بنسبة 43.7%
  • بعده جه Code Igniter Framework => بنسبة 14.9%
  • بعده جه Symfony Framework => بنسبة 13.6%
  • بعده جه Zend Framework => بنسبة 12.5%
كمان فيه اطر تانيه كتير مبرمجه بلغات غير ال php
  • زي مثلا ASP.NET مبرمج بلغه ال C#
  • و Django مبرمج بلغة ال Python وغيرهم
طب ايه أكثر اطر العمل انتشارا المستخدمه في التصميم
  • أول حاجه طبعا و وحش أطر عمل التصميم والأثر انتشارا علي الاطلاق Bootstrap
  • بيجي بعديه ال Foundation
  • ثم ال Pure
  • ثم ال Skeleton
  • و Montage
  • و Siimple
  • و Semantic UI

وغيرهم كتير
أسف اني طولت عليك
سلام عليكم

0 تعليق


اترك تعليق

انتظار....