skip Loading - تخطي التحميل
Ahmed Mohamed Hamed

عن حياتي

أنا والكرسي

2018-09-11 21:30:26 / عن حياتي / 9 تعليق / Ahmed Hamed
...

السلام عليكم
أنا والكرسي عشره من 2012 .. ناس كتير لما بتقابلني بتقولي مالك ؟ انت قاعد علي كرسي ليه ؟ وبقعد أشرح قصه طويله اوي .. فأنا قررت في المقال ده أحكي قصتي كلها من أول ما عملت حادثه لحد وقتنا هذا .. يمكن تطلعوا منها بأي حاجه ملهمه

-- رمضان 2012 غالبا كان شهر 8 وفي اخر 10 ايام في رمضان كنت معتكف في مجمع اسلامي عندنا ف البلد ، وفي اخر يوم في الاعتكاف اللي هوا المفروض يوم وقفه العيد الصغير ، كل المعتكفين بيروحوا هدومهم وكل حاجه كانوا واخدينها للاعتكاف وبيرجعوا تاني يكملوا يومهم عادي في المسجد لحد صلاة العشاء ، فأنا ف اليوم ده أخدت هدومي وكل حاجتي وركبت موتوسيكل علشان اروحهم ، روحتهم ووانا خارج من البيت ف طريقي للمسجد تاني ، لاقيت والدتي بتقولي موتوسيكلات تاني يا أحمد .. يا ابني خلي بالك بالله عليك وفضلت قصادي في البلكونه لحد أما اختفيت عن نظرها ، زي ما يكون كان قلبها حاسس اني رايح ومش هرجعلها علي رجلي تاني ، مشيت وبعد 200 متر او يمكن اقل عملت حادثه .. عملت حادثه ازاي ؟ وايه اللي حصل ؟ مش عارف !

أنا فوقت لقيت نفسي في توكتوك واتنين راكبين جمبي موديني المستشفي اللي في البلد اللي جمبنا ، وطبعا أنا بموووت من وجع ضهري ، رحت المستشفي الدكتور خيط راسي وكتفي علشان كانوا مفتوحين جامد وبينزفوا ، ومعرفشي يشخصني للأسف وحولني للمستشفي العام ف المركز اللي أنا فيه ، في اللحظه اللي أنا فيها في العربيه رايح للمستشفي حسيت بأدد ايه انا في مصيبه لما حاولت احرك رجلي اللي كنت بحركها من 10 دقايق ومش عارف أحرك حتي صوباع واحد ! ، رحت المستشفي وللاسف الشديد معرفوش يعملولي حاجه وحولوني علي الطوارئ في المنصورة ، لكن بابا رفض ووداني مستشفي خاص لان شايف اني فعلا تعبان ومبقتش قادر اخد نفسي ، كل اللف ده وأنا قاعد ع كرسي .. متخيللين معايا ضهري مكسور وقاعد علي كرسي لا الناس فاهمه ايه اللي عندي ولا حتي الدكاتره اللي روحتلهم قدروا يشخصوني للأسف ! ، واحنا في المنصوره في المستشفي وبعد ما عملت الاشاعات .. اذا بصاعقه تدمر قلوبنا كلنا .. الاشعه فيها ايه يا دكتور .. الأشعه فيها كدمه شديدة في الحبل الشوكي واحتمال كبير أحمد ميرجعشي يمشي تاني ولازم يدخل عمليات حالا ، وطبعا بعد ما سمعنا الخبر ده كلنا صُعقنا .. سلمت أمري لله وقولت أكيد هيبقي فيه حل وهمشي ان شاء الله ،

اوعي تكون يأست من كلامي أو حاجه ! .. أنا بقولك الكلام ده مش لحاجه ابدا والله الا اني عاوزك تاخد من قصتي دافعه ليك .. وتكمل وتعافر علشان توصل لحلمك أين كانت الظروف اللي بتمر بيها .. الظروف عمرها ما كانت عائق يوقفك عن حلمك اللي انت اصلا عايش علشانه .. نكمل موضوعنا بقي

جوز أختي كلم بابا وقاله احنا هنعمل العمليه في القصر الفرنساوي في القاهره مش عاملين عمليه صعبه زي دي هنا ، سافرنا القاهره في نفس اليوم بالليل ووصلنا القصر الفرنساوي وهناك استنيت لتاني يوم اللي هو يوم العيد أصلا ، ودخلت العمليه يوم العيد ، قبل ما أدخل سمعت الدكاتره بتتكلم أن العمليه في منطقه صعبه جدا واحتمال كبير أحمد يدخل العمليه بيرك ايده لكن هيخرج م العمليه لا بيحرك رجليه ولا ايديه ، قلبي وجعني أوي واتمنيت ساعتها أني أموت .. كنت مفكر الموت هيبقي راحه ليا غير ما اكتشفت دلوقت .. المهم دخلت العمليه ووأنا داخل عمال أبص في وشوش الناس .. حاسسهم بيودعوني واني هدخل العمليات ومش هخرج تاني .. لكن الحمد لله وبعد أكثر من 4 أو 5 ساعات بالعمليات خرجت معافي فاقد رجلي فقط . ومأثرتشي العمليه علي اديا الحمد لله ، وبعد شهور من اللي أنا كنت فيه ده وبعد ما فوقت شويه ، بدأت أفكر في مستقبلي وهكمل تعليمي ازاي علي كرسي خاصتا ان مصر غير مؤهله تماما لمستخدمي الكراسي المتحركه وانا لسه في مقتبل عمري عندي 15 سنه يمكن او 16 سنه كنت في أولي ثانوي لسه .. الناس فضلوا جمبي الحمدلله وكملت سنه اولي وتانيه .. وللأسف وبعد حادثتي بسنه او سنه ونص مات والدي وحسيت ساعتها ان كل حاجه في حياتي اتدمرت وان الضهر والسند الوحيد اللي كنت ممكن اتحمي فيه من الدنيا كلها اتكسر خلاص ومبقاش ليا حد ، ولكن وبعدها فتره فوقت الحمد لله وحمدت ربنا علي كل شئ وكملت تعليمي الثانوي ودخلت كلية حاسبات ومعلومات (خاصه) ، وانا في الكليه التنقل بالنسبالي كان صعب جدا ومكلف جدا لازم عربيه خاصه كل يوم وتستناني لحد أما اخلص وحوار ، لحد أما أمي الله يبارك في عمرها ويحفظها يارب جابتلي عربيه والموضوع بالنسبالي بقي سهل في التنقل بعد ما اتعلمت السواقه بدأت أروح الكليه بصفه شبه منتظمه الحمدلله

بدأت الكليه وفي أول سنه بدأنا نفهم نبذة مختصره عن كل مجال عمل ممكن لما نتخرج نشتغل فيه ، حبيت تصميم وتطوير المواقع والحمد لله مشيت فيه شوت كبير لحد أما وصلت لمستوي مُرضي لي وان شاء الله مكمل ومش هقف أبدا أين كانت الظروف

الشاهد بس م الموضوع واللي عاوز أقوله .. أن الدنيا مش هتقف علشان ظروفك ، ان مكنتش انت تتحددي نفسك وتتحدي الظروف وتعافر علشان توصل لحلمك ، صدقني الدنيا مش هتقف ليك

وفي الاخير : عاوز بس أشكر كل الناس اللي وقفت جمبي وساعدتني وكانوا ومازالوا سر سعادتي ف الدنيا والله

أبي ربنا يرحمه ويسكنه الفردوس الأعلي , أمي ، أخواتي ، أصدقائي ، أزواج أخواتي ، والانسانه اللي حبتني وعملت كتير أوي علشاني لكن النصيب مجمعناش ♥

شكرا جدا ليكم
سلام عليكم

9 تعليق


male
Abdelhady 2018-09-12 20:34:50

ربنا يطول ف عمرك ويسعدك ياااااااارب وديما ف تقدم

انتظار....
male
Ahmed Hamed 2018-09-12 20:48:41

تسلملي يارب يا بودي .. وربنا يخليك ليا يا حبيبي ☺

male
Abd Elmnam 2018-09-12 20:47:48

احسن مهندس وديساينر في مصر ربنا يوفقك ياهندسه ومن نجاح لنجاح مبسوطلك اوي علي التقدم اللي انت فيه وشغلك اللي بتفاجئ بيه يوم بعد يوم ان شاء الله اشوف في مكانه ابعد من دي بكتير ❤

انتظار....
male
Ahmed Hamed 2018-09-12 20:50:54

ربنا يخليك يا عبده يارب علي كلامك الحلو ده .. علشان تعرف بس ان الشاشه السوده جابت نتيجه اهي ☺

male
عباسط 2018-09-12 22:14:09

انا حبيتك اكتر ماكنت بحبك والله يبني ازاي يعدي 3 سنين ويكون علاقتي بيك في السلاب محدوده كدا!! ربنا يوفقك ياابوحميد ...انت نموذج مشرف ويكفيني فخر اني اتعرفت عليك في يوم من الايام .

انتظار....
male
Ahmed Hamed 2018-09-12 22:22:58

الله يصلح حالك يا عبااسط ياارب .. وربنا وحده يعلم أنا بحبك وبعزك أدد ايه والله .. وان شاء الله هيجي اليوم اللي نشوفك فيه أحسن معيد ودكتور في الدنيا .. ويكفيني أنا فخر ان احنا أصدقاء واخوات والله

male
Mohamed Elsayed Taha 2018-09-12 22:39:09

انا طول عمري من قبل حادثتك وبشوفك شخص مثالي و عندك عقليه حلوه وعندك طموح لكل حاجه والحمدلله كنت انت ومازالت علي هذا الطموح والاصرار للنجاح وانا متوقع انك هتبقي انسان ناجح جدا في مجالك وفي حياتك ربنا يكرمك يارب حبيب قلبي

انتظار....
male
Ahmed Hamed 2018-09-12 23:21:19

حبيب قلبي يا هندسه والله .. احنا عاوزين نبقي زيك بس والله يا فضل .. ربنا يصلح حالك يارب ويوفقك كمان وكمان .. ويسلملي مرورك يا حبيبي يارب ☺

male
Ahmed Elsaidy 2018-09-13 03:47:43

اولا الف مبروك ع الموقع واشوفك انسان ناجح ديما يارب ثانيا بقي والله يا احمد ربنا يعلم غلاوتك عندي وربنا يعلم أن كلام كتير في قلبي مش عارف اقوله اصلا بس انت اكتر واحد رغم كل حاجه انت الإنسان الوحيد اللي بتشجعني ع كل حاجه انت الوحيد اللي ديما واقف جمبي برغم كل الظروف اللي انت قولتها قادر يبقي عندك طاقه ايجابيه انك تشجع غيرك ع التفوق ربنا يخليك لينا وديمآ ناجح يا انضف شخصية انا عرفتها في حياتي

انتظار....
male
Ahmed Hamed 2018-09-13 16:33:57

انت حبيبي يا صعيدي والله وربنا وحده يعلم أنا بحبك وبعزك أدد ايه .. ونفسي اشوفك حاجه كبيره والله يا ابني .. ربنا يديمك أخ وصديق طول العمر يا حبيب قلبي .. بحبك في الله والله يا ابني ☺

male
محمود محمد عبد الخالق 2018-09-13 07:43:22

ربنا يحميك ويسعدك فى حياتك يارب انت انسان جميل ومحترم واتمنى اكون اخ صغير ليك اتمنى لك المزيد من النجاح والتفوق ف عملك يارب

انتظار....
male
Ahmed Hamed 2018-09-13 16:35:26

حبيبي .. الله يصلح حالك ويوفقك يارب .. وتسلملي ع الكلام الحلو ده .. ويشرفني طبعا نكون اخوات وأصدقاء ☺

male
Ahmed elhoseny 2018-09-13 09:36:18

ربنا يوفقك ياهندسه وتحقق اللي بتتمنااه

انتظار....
male
Ahmed Hamed 2018-09-13 16:36:05

تسلم يا ابو حميد .. ربنا يصلح حالك يا حبيب ☺

female
Shereen Ibrahim 2019-01-14 19:04:58

أنت رائع وجميل

انتظار....
male
Ahmed Hamed 2019-01-14 19:06:56

شكرا لحضرتك

male
Ahmed elbastwissy 2019-08-11 18:16:19

انتا محترم وعندك عزيمة يا احمد وتستحق كل خير بجد واشهد لك بالشهامة والجدعنه ربنا يوفقك ❤️

انتظار....
male
Ahmed Hamed 2019-08-19 11:33:24

أنت حبيبي والله يا بسطويسي .. ربنا يصلح حالك انت كمان يارب ونشوفك دكتور أدد الدنيا ♥

اترك تعليق

انتظار....